O 10º Repsol EcoRallye A Coruña reunirá a seis campións de España na súa grella de saída

Figuras de primeiro nivel como José Manuel Pérez Aicart, Eneko Conde, Shirley Fernández, Laura Aparicio, Toni Luján ou José Manuel Pizarro competirán nuhna edición histórica puntuable para a FIA Eco Rally Cup e o CEEA RACE.

José Manuel Pérez Aicart defenderá nas estradas galegas a súa condición de actual líder do Campionato de España, mentres que a Escudería La Coruña acude como entidade líder da clasificación por escuderías.

Tamén participarán na proba os líderes da clasificación de híbridos enchufables e non enchufables: José Antonio Luján e Jorge Prado, respectivamente.

A décima edición do Repsol EcoRallye A Coruña consolídase un ano máis como unha cita imprescindible do automobilismo sustentable nacional e internacional. A proba, organizada pola Escudería La Coruña, congregará nas estradas galegas á elite do Campionato de España de Enerxías Alternativas (CEEA RACE), cun plantel de inscritos que reúne aos máximos referentes e campións das distintas disciplinas de eficiencia e regularidade.

Entre os nomes máis destacados que tomarán a saída figura o castelao José Manuel Pérez Aicart, quen, xunto ao seu copiloto Javier Herrera, aterra na Coruña tras lograr un impecable palmarés con catro títulos nacionais consecutivos entre 2022 e 2025 na categoría de 100% eléctricos. Pérez Aicart acude á cita galega non só como referente absoluto da disciplina, senón defendendo de forma directa a súa condición de actual líder da clasificación xeral na categoría raíña.

Xunto a el compite o vasco Eneko Conde, acompañado de Joseba Rodríguez, ambos os dous baixo as cores da Escudería La Coruña, que conta con outros pilotos de altísimo nivel como Ángel Santos, terceiro na clasificación de híbridos enchufables. O biscaíño é unha auténtica legenda en activo do certame que acumula nas súas vitrinas seis campionatos de España na categoría EV, logrados en 2016, 2017, 2018, 2020, 2021 e 2022, ademais de acadar dúas veces o título mundial no certame FIA ou dúas victorias consecutivas nos dous últimos EcoRallyes de Montecarlo, sendo o único piloto na historia en logralo.

O apartado de vehículos híbridos contará tamén cunha representación de primeiro nivel da man de Laura Aparicio, vixente campioa de España de Híbridos Non Enchufables en 2025 e que competirá na categoría de híbridos enchufables (actualmente ocupa a segunda posición da clasificación xeral), e de Toni Luján, referente da categoría de non enchufables tras proclamarse campión nacional desta mesma disciplina nos anos 2021 e 2022. A este plantel súmanse a galega Shirley Fernández, bicampioa de España de Híbridos Enchufables nas tempadas 2022 e 2023, e José Manuel Pizarro, quen conquistou o entorchado nacional na categoría de híbridos non enchufables na edición de 2024.

Ademais, cabe destacar que tamén estarán na Coruña os actuais líderes das tres categorías do Campionato de España de Enerxías Alternativas. Ao xa mencionado Pérez Aicart súmanse José Antonio Luján na categoría de híbridos enchufables e Jorge Prado, que lidera a categoría de híbridos non enchufables cunha considerable vantaxe respecto dos seus máis inmediatos perseguidores.

O atractivo deportivo do 10º Repsol EcoRallye A Coruña estenderase así mesmo ao apartado de escuderías, onde a propia entidade organizadora, a Escudería La Coruña, afrontará a proba da casa desde unha posición de privilexio ao encabezar actualmente a clasificación xeral do Campionato de España por escuderías. Con este excepcional cadro de participantes, sumados aos xa anunciados campións do mundo, e un percorrido exixente que medirá ao milímetro a regularidade e o consumo eficiente, a décima edición do certame garante un espectáculo de máximo nivel tecnolóxico e deportivo na estrada.