A praza do Obradoiro será un dos puntos de reagrupamiento da oitava edición do Eco Rallye A Coruña

• A proba disputarase do 20 ao 22 de setembro e pasará por 31 municipios da provincia, máis do dobre que o ano anterior.
• A frota de vehículos participantes na proba, puntuable para o Campionato do Mundo Bridgestone FIA Eco Rally Cup, terá a icónica praza do Obradoiro como punto de reagrupamiento o venres 20 de setembro.
• Betanzos e Carballo, ambas as localidades o sábado 21, serán os outros dous puntos de reagrupamiento na que será a edición máis extensa ata a data.

O Eco Rallye A Coruña chegará á capital galega o vindeiro venres 21 de setembro cando a frota de vehículos participantes na oitava edición da proba desembarque, logo da saída na praza coruñesa de María Pita, no Obradoiro para o reagrupamiento no primeiro tramo da carreira.

Así o ratificaron hoxe o responsable da carreira, Alberto González Olañeta, xunto co concelleiro de Mobilidade do Concello de Santiago de Compostela, Xan Duro, e representantes da Policía Local da cidade, despois de manter unha reunión no Pazo de Raxoi para abordar diferentes aspectos relacionados coa organización e a seguridade da cita, da que o goberno local compostelán será entidade colaboradora.

Segundo indicou González Olañeta, “é un pracer que Santiago, e especialmente a praza do Obradoiro, poidan ser parte desta edición e servir como escaparate na que será a edición máis extensa da proba referente do automobilismo sostible no noroeste peninsular”.

O responsable da carreira tamén mostrou o seu agradecemento “pola predisposición do goberno local para Santiago sexa un dos puntos destacados na celebración desta proba de carácter internacional”.

A competición disputarase os días 20, 21 e 22 de setembro con distintos tramos que transcorrerán este ano por 31 municipios, unha terceira parte dos que integran a provincia da Coruña.

Este ano o Eco Rallye A Coruña, ademais, estréase como proba puntuable para o Campionato do Mundo Bridgestone FIA Eco Rally Cup, o que supón un gran impulso a nivel internacional da proba.

Betanzos e Carballo serán os puntos de reagrupamiento do sábado

Pola súa banda, o sábado 21 a proba terá dous novos puntos de reagrupamiento tal e como confirma a organización desta. Pola mañá, os automóbiles participantes se reagruparán na cidade de Betanzos mentres que pola tarde farano no municipio de Carballo.